Ulmasbayeva Malika Alisherovna
O‘zbek va xorijiy tillar kafedrasi dotsenti
pedagogika fanlari boʼyicha falsafa doktori (PhD)
Biografiya
Ulmasbayeva Malika Alisherovna — pedagogika fanlari bo‘yicha falsafa doktori (PhD), O‘zbekiston xalqaro islomshunoslik akademiyasi O‘zbek va xorijiy tillar kafedrasi dotsenti.
U 2019-yildan buyon O‘zbekiston xalqaro islomshunoslik akademiyasida faoliyat yuritib kelmoqda. Mehnat faoliyatini o‘qituvchi sifatida boshlagan bo‘lib, 2024-yildan katta o‘qituvchi, 2025-yildan dotsent vazifasini bajaruvchi lavozimida ishlab kelmoqda.
2020-yilda O‘zbekiston milliy pedagogika universiteti mustaqil tadqiqotchiligiga qabul qilingan va 2023-yilda pedagogika fanlari bo‘yicha falsafa doktori (PhD) ilmiy darajasini muvaffaqiyatli himoya qilgan.
M. A. Ulmasbayeva ta’lim metodikasi, xorijiy tillarni o‘qitish, talabalarda tolerantlikni rivojlantirish hamda zamonaviy pedagogik texnologiyalarni joriy etish masalalari bo‘yicha ilmiy izlanishlar olib boradi. U 35 dan ortiq ilmiy maqola va tezislar, uchta o‘quv qo‘llanma hamda “Oliy ta’lim muassasalari talabalari orasida tolerantlikni rivojlantirish texnologiyalarini takomillashtirish” nomli monografiya muallifidir. Mazkur monografiya O‘zbekiston Respublikasi Adliya vazirligi huzuridagi Intellektual mulk agentligining mualliflik guvohnomasi bilan himoyalangan.
Olimaning ilmiy faoliyati xalqaro ilmiy hamjamiyat tomonidan ham e’tirof etilgan. U muntazam ravishda xalqaro konferensiyalar va ilmiy forumlarda ishtirok etib keladi. Jumladan, 2020-yilda Chexiyada Erasmus+ dasturi doirasida “Presentation Skills” malaka oshirish kursini tamomlagan, 2025-yilda Thailand TESOL xalqaro konferensiyasi hamda Immerge International Summit xalqaro forumida ishtirok etgan.
Pedagogik faoliyatida CLIL, Communicative Language Teaching va Task-Based Learning kabi zamonaviy ta’lim metodlarini samarali qo‘llab, talabalarning tanqidiy fikrlashi, ijodiy yondashuvi va mustaqil ta’lim olish ko‘nikmalarini rivojlantirishga alohida e’tibor qaratadi. Shuningdek, “Ustoz–shogird” tizimi doirasida yosh tadqiqotchilarni qo‘llab-quvvatlash va ularning ilmiy salohiyatini rivojlantirish bo‘yicha faol ish olib bormoqda.
Hozirda M. A. Ulmasbayeva metodika va ta’lim texnologiyalarini sun’iy intellekt asosida takomillashtirish yo‘nalishida ilmiy izlanishlarini davom ettirmoqda hamda pedagogika fanlari doktori (DSc) ilmiy darajasini olish ustida ishlamoqda.