Maxmasobirova Feruza Uktam qizi
Islom tarixi va manbashunosligi IRCICA kafedrasi stajyor o‘qituvchisi
Biografiya
Maxmasobirova Feruza Uktam qizi — tarixchi va islomshunos-manbashunos. Hozirgi kunda O‘zbekiston xalqaro islom akademiyasining "Islom tarixi va manbashunosligi – IRCICA" kafedrasi stajyor-o‘qituvchisi hamda Fransiyaning Eks-Marsel universiteti (Aix-Marseille Université) "Ecole Doctorale Espaces, Cultures, Sociétés" doktorantura maktabi doktoranti (PhD bosqichi).
Oliy ta’limning bakalavriat bosqichini Toshkent islom universitetida (2018) tamomlagan. So‘ngra O‘zbekiston xalqaro islom akademiyasi (2021) va Eks-Marsel universitetida (2020) magistratura darajasini olgan. Muzeyshunoslik va madaniy meros yo‘nalishida tajriba oshirish maqsadida 2023-yilning oktyabr-dekabr oylarida Luvr muzeyining (Musée du Louvre) "Islom san’ati" bo‘limida ilmiy amaliyot o‘tagan.
Tadqiqotchining ilmiy qiziqishlari doirasiga Markaziy Osiyo tarixi, islom sivilizatsiyasi, madaniy meros obidalari va manbashunoslik masalalari kiradi. Hozirda u "VIII–XIII asrlarda Termiz shahrining tarixi" mavzusida doktorlik dissertatsiyasi ustida ish olib bormoqda. Mazkur tadqiqot o‘rta asrlarda Termiz shahrining ijtimoiy-siyosiy, iqtisodiy va madaniy jarayonlardagi o‘rnini birlamchi manbalar asosida o‘rganishga qaratilgan. F. Maxmasobirova o‘z tadqiqot natijalari bilan Fransiya, Italiya va Vengriyada o‘tkazilgan xalqaro ilmiy-amaliy konferensiyalarda ma’ruzalar qilgan.
Mehnat faoliyati davomida O‘zbekistondagi Islom sivilizatsiyasi markazining Ilmiy tadqiqotlar bo‘limida (2018–2019 yy.) hamda Muzey va eksponatlar ilmiy bo‘limida (2025-yil may–sentyabr) kichik ilmiy xodim lavozimlarida ishlagan. 2025-yilning 8-sentyabridan buyon O‘zbekiston xalqaro islom akademiyasida pedagogik faoliyat ko‘rsatmoqda. Ilmiy tadqiqot jarayonida fransuz, ingliz va rus tillaridan akademik darajada, arab, fors va turk tillaridan esa manbalar bilan ishlash darajasida foydalanadi.