Asrorov Ilg'or Fayzi o'g'li
O‘zbek va xorijiy tillar kafedrasi katta o‘qituvchisi
Biografiya
Ilg‘or Fayzi o‘g‘li Asrorov 1994-yil 11-yanvarda Toshkent viloyatida tug‘ilgan. 2013–2017-yillarda O‘zbekiston davlat jahon tillari universitetida tahsil olib, xorijiy til va adabiyoti (ingliz tili) mutaxassisligi bo‘yicha bakalavr darajasini olgan. Keyinchalik o‘z bilim va malakasini muntazam ravishda oshirib, 2019-yilda Toshkentdagi Webster universitetida hamda 2024-yilda Buyuk Britaniyaning Reading universitetida magistratura bosqichlarini tamomlagan.
Mehnat faoliyatini 2017-yilda O‘zbekiston Milliy universiteti huzuridagi akademik litseylarda ingliz tili fani o‘qituvchisi sifatida boshlagan. 2017–2019-yillar davomida O‘zbekiston Milliy universiteti qoshidagi Zangiota akademik litseyi hamda S.X. Sirojiddinov nomidagi akademik litseyda ingliz tili fanidan dars berib, yosh avlodning xorijiy tillarni puxta o‘zlashtirishi yo‘lida samarali faoliyat yuritgan.
2019–2023-yillarda O‘zbekiston xalqaro islom akademiyasi Chet tillari kafedrasida o‘qituvchi-stajyor lavozimida faoliyat olib borgan. Ushbu davr mobaynida talabalarga ingliz tilini o‘qitish metodikasi, akademik yozuv, kasbiy kommunikatsiya va zamonaviy pedagogik texnologiyalar asosida ta’lim berish bilan shug‘ullangan.
2024-yildan buyon O‘zbekiston xalqaro islomshunoslik akademiyasining “O‘zbek va xorijiy tillar” kafedrasida katta o‘qituvchi lavozimida faoliyat yuritib kelmoqda. U o‘quv jarayoniga innovatsion yondashuvlarni tatbiq etish, raqamli texnologiyalar asosida ta’lim samaradorligini oshirish hamda talabalarning til kompetensiyalarini rivojlantirish borasida izchil ilmiy-pedagogik faoliyat olib bormoqda.
I.F. Asrorovning ilmiy qiziqishlari xorijiy tillarni o‘qitish metodikasi, oliy ta’limda raqamli texnologiyalardan foydalanish, talaba va o‘qituvchi motivatsiyasini oshirish hamda antropotsentrik ta’lim yondashuvlari bilan bog‘liq masalalarni qamrab oladi. U mazkur yo‘nalishlarda ilmiy maqolalar, o‘quv-uslubiy materiallar va ilmiy-amaliy ishlanmalar tayyorlash bilan shug‘ullanib kelmoqda.
Pedagogik faoliyati davomida Ilg‘or Asrorov talabalarning mustaqil fikrlash, tanqidiy tahlil qilish va amaliy ko‘nikmalarini rivojlantirishga alohida e’tibor qaratib kelmoqda. Uning mashg‘ulotlari zamonaviy ta’lim metodlari, interaktiv usullar va axborot-kommunikatsiya texnologiyalaridan samarali foydalanishga asoslangan bo‘lib, talabalarning nazariy bilimlarini amaliy faoliyat bilan uyg‘unlashtirishga xizmat qiladi.
Shuningdek, I.F. Asrorov xalqaro hamkorlik, akademik mobillik va xorijiy tajribalarni ta’lim jarayoniga joriy etish yo‘nalishlarida faol ishtirok etib, oliy ta’lim sifatini oshirishga munosib hissa qo‘shib kelmoqda.